पन्हाळा (कोल्हापूर) : पन्हाळा येथील संजीवन अभियांत्रिकी महाविद्यालयातील राष्ट्रीय सेवा योजनेच्या सर्व विद्यार्थिनी आणि विद्यार्थ्यांनी कॉलेजचे प्राचार्य डॉ. जी. व्ही. मुळगुंद यांच्या उपस्थितीत कॉलेज परिसरात वृक्षारोपण केले. महाराष्ट्र सरकारच्या एक ते सात जुलैपर्यंत चार कोटी वृक्ष लागवडीच्या निर्धारात सहभाग म्हणून विद्यार्थ्यांनी या कार्यक्रमाचे आयोजन केले होते.
वृक्षारोपणासाठी राष्ट्रीय सेवा योजनेच्या विद्यार्थ्यांनी कॉलेज परिसरात स्वतः श्रमदानातून खड्डे खणले. ‘आव्हान नवे पेलू चला, हिरवे रान फुलवू चला’ अशा अनेक घोषणा विद्यार्थ्यांनी या वेळी दिल्या. कार्यक्रमाचे आयोजन राष्ट्रीय सेवा योजनेचे समन्वयक आणि क्रीडा शिक्षक प्रा. रणजित इंगवले यांनी केले होते. त्यांना एस. बी. जाधव, नितीन बहादुरे व उद्यान विभागातील कर्मचारी यांचे सहकार्य लाभले. राष्ट्रीय सेवा योजनेचा विद्यार्थी प्रमुख सौरभ पाटील, विद्यार्थिनी प्रतिनिधी सौरभी कुरणे यांच्यासह सर्व विद्यार्थी आणि विद्यार्थिनी या कार्यक्रमाला उपस्थित होते. कॉलेजचे प्राचार्य डॉ. जी. व्ही. मुळगुंद, संजीवन संस्थेचे अध्यक्ष पी. आर. भोसले, सहसचिव एन. आर. भोसले यांचे या कार्यक्रमास विशेष मार्गदर्शन व सहकार्य लाभले.
